गुरुजी नअ ध्यालअ रअ, थारा जनम-जनम का दुखड़ा मिटालअ रअ।
जनम-मरण का काट मोरछा, परित पुरबली पालअ रअ॥(टेर)

सतगुरु दाता बेद बण आया, करमारी नबज दखालअ रअ।
देख नबज समजकर दाता, करम नाड़ को चालअ रअ॥
गुरुजी नअ ध्यालअ रअ, थारा जनम-जनम का......॥(1)

करम काटबा की राई बतावअ, गुरुगम वोगत पालअ रअ।
सबद जड़ी पर ग्यान मसालो, चेतन होर चडालअ रअ॥
गुरुजी नअ ध्यालअ रअ, थारा जनम-जनम का......॥(2)

जत, मत, सत सूं होजा घाडो, देख जगत मत हालअ रअ।
चित मन बुद्धि अन्त सुद्धि करके, तिरगुण पाप मिटालअ रअ॥
गुरुजी नअ ध्यालअ रअ, थारा जनम-जनम का......॥(3)

होजा अणरोगी रोग नईं ब्यापअ, अजर अमर घर पालअ रअ।
राम बक्स परितम की नगरी, गुरुगम ग्यान‍ चलावअ रअ॥
गुरुजी नअ ध्यालअ रअ, थारा जनम-जनम का......॥(4)